Биылғы жылы Жалпы білім беретін пәндер бойынша 10-11(12) сынып оқушыларына арналған республикалық олимпиаданың қоғамдық-гуманитарлық бағыттағы қазақ тілі мен әдебиеті пәндерінен олимпиада сәуір айының 1-2-сі күндері Батыс Қазақстан облысында өтеді. Білім додасының өту базасын таңдау Ақжайық өңіріндегі байырғы білім ордасы, 100 жылдық тарихы бар, жақында ғана күрделі жөндеуден өткен біздің киелі қара шаңырағымызға түсті. Қазақ тілі мен әдебиеті пәндерінен республикалық олимпиаданың «Қазақты қазақ дейік, тарихи қатені түзейік», «Кеңсе тілі қазақша болмай, іс оңбайды», -деп тіл болашағына үлкен көзқараспен қараған ұлт жанашыры Сәкен Сейфуллин атындағы біздің дарын мектебінде өтуі мектеп үшін үлкен мәртебе.
Қазіргі таңда мектебіміздің интернатына әр өңірден келетін 173 оқушыны қарсылап жатырмыз. Өз өңірлерінің намысын қорғауға келген олимпиадаға қатысушы барша оқушыларға сәттілік тілейміз!