Бүгін Жәңгір хан атындағы Батыс Қазақстан аграрлық-техникалық университетінде Басқарма төрағасы-ректордың орынбасары, оқу жұмыстары жөніндегі проректор Нұркен Маратұлы мен дарынды балаларға арналған С.Сейфуллин атындағы №11 мектеп-лицей-интернатының директоры Шынар Мүлкәйқызы әлеуметтік серіктестік орнату бағытында меморандумға қол қойды.
Ортақ мүдделер аясында кадрлар даярлау және түлектерді жұмысқа орналастыру бағытында ұзақ мерзімді ынтымақтастықты дамытуға бағытталған бұл келісім – білім мен тәжірибені ұштастыру арқылы болашақ мамандардың кәсіби қалыптасуына жаңа мүмкіндіктер ашады.
Екіжақты меморандум аясында университет пен мектеп-лицей бірлескен білім беру жобаларын іске асыруды, кәсіптік бағдар беру және танымдық іс-шараларды өткізуді жоспарлап отыр. Сонымен қатар, оқушылар университеттің ғылыми-зерттеу орталықтарымен танысып, жоғары білім беру жүйесіне ерте бейімделу мүмкіндігіне ие болады.
Бұл серіктестік – Жәңгір хан университетінің мектептермен тығыз байланыс орнату арқылы сапалы білім беруге және болашақ кәсіби кадрларды даярлауға бағытталған маңызды қадамы.
